कृष्णभीरमा ट्रयाक खुलेपछि २० भन्दा बढी ठूला सवारी गुडे, असोज १ बाट नियमित सञ्चालनको तयारी

काठमाडौं । त्रिशूली र भोटेकोसी नदीमा आएको बाढीले पृथ्वी राजमार्गअन्तर्गत कृष्णभीरमा सडक कटान गरेपछि अवरुद्ध भएको मार्गमा आइतबार परीक्षणस्वरूप ठूला सवारीसाधन सञ्चालन गरिएको छ। सडक विभागका अनुसार काठमाडौं र चितवन दुवैतर्फबाट गरी ग्यास बुलेटसहित करिब २० वटा ठूला सवारीसाधन निर्माण गरिएको नयाँ ट्रयाक हुँदै सफलतापूर्वक आवतजावत गरेका छन्। चितवनबाट काठमाडौं आउनेतर्फ भने एउटा भारी सवारीसहित केही हलुका सवारी पनि सञ्चालन गरिएको विभागले जनाएको छ।

विभागले जारी गरेको विज्ञप्तिमा निर्माणाधीन ट्रयाकको अवस्था र सवारी सञ्चालनको सम्भाव्यता परीक्षण गर्न सवारीसाधन चलाइएको उल्लेख छ। परीक्षण सफल भए पनि सडक स्तरोन्नति तथा सुरक्षासम्बन्धी बाँकी काम पूरा भइनसकेकाले तत्कालै नियमित आवागमन खुला नगरिएको विभागले स्पष्ट पारेको छ।