धुपीको अवैध कटान

जुम्लाको पर्यटकीय गन्तव्य गिडीदहतर्फ जाने बाटोमा पर्ने फुलचौल्या पाटन क्षेत्रका धुपीका रुख व्यापक रूपमा कटान भएको पाइएको छ । तातोपानी गाउँपालिका–४ अन्तर्गत पर्ने उक्त क्षेत्रमा अवैध रूपमा रुख कटानी भएको छ । प्राकृतिक रूपमा पनि सुक्ने क्रम बढेपछि वनक्षेत्र सङ्कटमा परेको स्थानीय जनप्रतिनिधिको भनाइ छ ।

तातोपानी गाउँपालिका–४ का वडाध्यक्ष अमरबहादुर रोकायाले फुलचौल्या पाटनमा रहेका अधिकांश धुपीका रुख जथाभाबी काटिएको बताउनुभयो । वन विनाश रोक्नका लागि पटक पटक डिभिजन वन कार्यालयलाई जानकारी गराइएको छ । वडाको टोली र सामुदायिक वन उपभोक्ता समूहले संयुक्त रूपमा गस्ती गर्ने र अनुगमन गर्ने गरिएको छ भने रुख काट्ने कार्यमा संलग्नलाई रसिद काटेर कारबाही प्रक्रियासमेत अगाडि बढाइएको छ ।

वन संरक्षणका लागि जिल्ला डिभिजन वन कार्यालयमा निरन्तर पहल गरिएको बताउँदै उहाँले भन्नुभयो, “अघिल्लो वर्षको तुलनामा यस वर्ष धुपीको विनाश केही घटेको भए पनि लुकिछिपी चोरी गरेर वन विनाश गर्नेलाई कडा कारबाहीको व्यवस्था भए मात्र चोरी कटानी घट्ने छ ।”

पर्यटकीय तथा पर्यावरणीय दृष्टिले महत्वपूर्ण फुलचौल्या पाटनका धुपी वन संरक्षणका लागि सरोकारवाला निकायले अझ प्रभावकारी पहल गर्नुपर्ने पनि उहाँले बताउनुभयो । वन विनाश रोक्न कडा निगरानी, दोषीमाथि कानुनी कारबाही र दीर्घकालीन संरक्षण योजना आवश्यक रहेको स्थानीयको भनाइ छ । डिभिजन वन कार्यालय जुम्लाका प्रमुख भरत बुढ्थापाले फुलचौल्या पाटनसँगै आसपासका अन्य पाटन क्षेत्रमा हुने अवैध कटानीसमेत रोक्न वन कार्यालय, स्थानीय तह र सामुदायिक वन उपभोक्ता समूहबिच समन्वय बढाइएको बताउनुभयो ।