कमजोर संरचनाका कारण जोखिमपूर्ण यात्रा

अर्घाखाँचीको जिल्ला सदरमुकाम सन्धिखर्कलाई पूर्वपश्चिम महेन्द्र राजमार्गसँग जोड्ने सन्धिखर्क–गोरुसिङ्गे सडक निर्माण सुरु भएको ५३ वर्ष बितिसक्दा पनि पूर्ण सुरक्षित हुन सकेको छैन । सडकका दर्जनौँ साँघुरा मोड, कमजोर संरचना र अपर्याप्त चौडाइका कारण यात्रु अझै जोखिमपूर्ण यात्रा गर्न बाध्य छन् ।

२०३० सालमा स्थानीयवासीले कोदालो, गैती र बेल्चाको सहायताले निर्माण थालेको यो सडक अहिले जिल्लाको प्रमुख जीवनरेखा मात्र नभई धार्मिक तथा पर्यटकीय मार्गका रूपमासमेत स्थापित भएको छ । कपिलवस्तुको गोरुसिङ्गेबाट ठाडा, नरपानी हुँदै सन्धिखर्क जोड्ने ६८ किलोमिटर लामो सडकमार्फत सुपा देउराली मन्दिर पुग्ने तीर्थयात्री, गुल्मी, पाल्पा तथा दाङबाट आवतजावत गर्ने यात्रुको चाप उल्लेख्य रूपमा बढेको छ ।