मन्दिरमा आगो लगाउने घोषण गर्ने परियारविरुद्ध ४ दिन म्याद थप

काठमाडौँ । मठ,मन्दिरमा आगो लगाउने घोषणा गरेका जनक परियारलाई ४ दिन हिरासतमा राख्न अदालतले अनुमति दिएको छ । रुकुम पश्चिमको आठबिसकोट नगरपालिका–१२ घर भएका परियारलाई अनुसन्धान गर्न ४ दिनको म्याद थप भएको जिल्ला प्रहरी परिसर काठमाडौँका एसपी पवन भट्टराईले रातोपाटीलाई बताए ।

शुक्रबार टोखाबाट पक्राउ परेका परियार विरुद्ध प्रहरीले धार्मिक भावनामा आघात पुर्‍याउनु नहुने कसुरमा अनुसन्धान गरिरहेको छ । २७ वर्षीय परियारले अनामनगरस्थित संवाद डबलीमा बोल्दै ‘मठ मन्दिरमा आगो लगाइदिन्छौँ’ भनेका थिए । उनले समान अधिकार नभएर देशभर विद्रोह गर्ने चेतावनी दिएका थिए ।