इन्जिनमा समस्या आएपछि वाइडबडी जहाज जापानमा रोकियो, अन्तर्राष्ट्रिय उडान प्रभावित

काठमाडौं । नेपाल वायुसेवा निगमको एउटा मात्र सञ्चालनमा रहेको वाइडबडी जहाज जापानमै रोकिएपछि निगमको अन्तर्राष्ट्रिय उडान तालिका फेरि प्रभावित भएको छ । जापानको नारिताबाट सोमबार बिहान काठमाडौं फर्किनुपर्ने जहाजमा प्राविधिक समस्या देखिएपछि २२६ यात्रुसहितको उडान अनिश्चित बनेको हो ।

निगमको वाइडबडी जहाज आइतबार राति ११ बजे काठमाडौंस्थित त्रिभुवन अन्तर्राष्ट्रिय विमानस्थलबाट जापानका लागि उडेको थियो । निर्धारित तालिकाअनुसार सोमबार जापानको स्थानीय समयअनुसार बिहान साढे १० बजे नारिताबाट उडेर दिउँसो ३ बजे काठमाडौं अवतरण गर्नुपर्ने थियो । तर जहाजको इन्जिनमा समस्या देखिएपछि नारितामै रोकिएको हो ।