बाढीको पीडाबीच तीज, पशुपतिमा भक्तजनको भीड; ‘यसपालि रौनक कम छ’

काठमाडौँ ।

हिन्दु महिलाको प्रमुख पर्व हरितालिका तीज आज देशभर श्रद्धा र भक्तिभावका साथ मनाइँदैछ । तीजका अवसरमा पशुपतिनाथ मन्दिरसहित देशभरका शिवालयमा श्रीमानको दीर्घायु, पारिवारिक सुखशान्ति तथा अविवाहित महिलाले योग्य जीवनसाथीको कामना गर्दै व्रत बसेर पूजाआराधना गर्ने भक्तजनको भीड लागेको छ । पशुपतिनाथ मन्दिरमा बिहानैदेखि व्रतालु महिला तथा भक्तजनहरू लामवद्ध भएर पूजाआराधना गरिरहेका छन् । यसपटक भने विगतका वर्षको तुलनामा तीजको रौनक केही कम देखिएको भक्तजनहरूले बताएका छन् । देशका विभिन्न स्थानमा आएको बाढी तथा विपद्बाट ठूलो जनधनको क्षति भएकाले उत्सवको माहौलमा समेत त्यसको प्रभाव परेको उनीहरूको भनाइ छ । पशुपति दर्शनका लागि आउनुभएकी सिर्जना गिरीले देशमा पछिल्लो समय भएका दुःखद् घटनाबाट ज्यान गुमाएकाहरूप्रति श्रद्धाञ्जली अर्पण गर्दै शोकमा रहेका परिवारलाई धैर्य धारण गर्ने शक्ति मिलोस् भनेर पशुपतिनाथसँग प्रार्थना गरेको बताउनु भयो । उहाँले तीज महिलाहरूका लागि विशेष पर्व भएको र परम्परादेखि नै श्रीमान्को दीर्घायुको कामना गर्दै निराहार व्रत बस्ने चलन रहेको बताउनु भयो । त्यस्तै, मीरा लोहनीले यसपटक पशुपतिनाथको दर्शन सहज भएको बताउनु भयो । विगतमा लामो समय लाइन बस्नुपर्ने भएपनि यसपालि सहज रूपमा दर्शन गर्न पाएको उहाँको भनाइ छ ।