धनकुटाको लेगुवामा आगलागी, ४ लाख २२ हजार बराबरको क्षति

८ असार, धनकुटा । धनकुटाको महालक्ष्मी नगरपालिकामा आगलागी हुँदा दुई तले घरको माथिल्लो तला जलेर नष्ट भएको छ ।

महालक्ष्मी नगरपालिका-५, लेगुवा शिवरात्री टोलका शिवकुमार तुम्बाको टिनको छानो भएको दुई तले घरमा विद्युत् सर्ट भई आगलागी भएको प्रहरीले जनाएको छ ।

आगलागीबाट माथिल्लो तला पूर्णरूपमा जलेर नष्ट हुँदा करिब ४ लाख २२ हजार बराबरको क्षति भएको जिल्ला प्रहरी कार्यालय धनकुटाका प्रहरी नायब उपरिक्षक हेमन्त भण्डारी क्षेत्रीले जानकारी दिए ।

आगलागीमा परी सोही घरमा डेरा गरी बस्ने संखुवासभा जिल्लाको पाँचखपन नगरपालिका-७ की मिना चापागाईंको खाद्यान्न, लत्ताकपडा, भाँडावर्तन, ल्यापटप, टेलिभिजन र मोबाइल फोन जलेर नष्ट भएको छ ।

आगलागीबाट घरधनी शिवकुमार तुम्बाको काठपात, धान, मकै तथा लत्ताकपडा जलेर क्षति भएको क्षेत्रीले जानकारी दिए ।

आगलागीबाट मानवीय तथा चौपाया क्षति भने नभएको प्रहरीको भनाइ छ ।