एघार किलोवाट मोटर भएको याडिया किनेस मोटरसाइकल नेपाली बजारमा, मूल्य ६ लाख ६० हजार

काठमाडौं । नेपाली बजारमा याडिया किनेस इलेक्ट्रिक मोटरसाइकल भित्रिएको छ । नेपालका लागि आधिकारिक वितरक कुजु नेपाल प्रालिले उक्त मोटरसाइकल नेपाली बजारमा बिक्री वितरण गर्न थालेको हो ।

साथै, कम्पनीले आज नेपालमा सो मोटरसाइकल सार्वजनिक समेत गरेको छ । उच्च प्रदर्शन गर्नसक्ने क्षमता र आकर्षक डिजाइन भएको चाइनिज ब्रान्डको यो मोटरसाइकल आधुनिक प्रविधि, शक्तिशाली प्रदर्शन र प्रिमियम अनुभव खोज्ने राइडरहरुलाई उचित रहेको कम्पनीको दाबी छ ।

Advertisement

याडिया किनेसमा ११ किलोवाट क्षमताको उच्च प्रदर्शनयुक्त मिड–ड्राइभ मोटर जडान गरिएको छ । जसले ३०० एनएम टर्क उत्पादन गर्छ । यसले तीव्र एक्सेलेरेसन र उत्कृष्ट सडक प्रदर्शन सुनिश्चित गर्ने कम्पनीले जानकारी दिएको छ । किनेसले ० देखि ५० किलोमिटर प्रतिघण्टाको गति केवल ३ सेकेन्डमा प्राप्त गर्न सक्छ भने यसको अधिकतम गति १०० किलोमिटर प्रतिघण्टा रहेको छ ।

यी विशेषताले यसलाई नेपालकै उत्कृष्ट र शक्तिशाली इलेक्ट्रिक मोटरसाइकलहरूमध्ये एक बनाएको कम्पनीले बताएको छ । नेपालका फरक–फरक सडक र उकालो बाटोलाई ध्यानमा राखेर बनाइएको याडिया किनेसले २० डिग्रीसम्मको उकालो सजिलै पार गर्ने कम्पनीले बताएको छ । साथै, याडिया किनेसले ४.६ किलोवाट घण्टा क्षमताको ब्याट्री प्रयोग गरिएको छ, जसलाई ४० भन्दा बढी सुरक्षा सुविधासहितको स्मार्ट ब्याट्री व्यवस्थापन प्रणालीले सुरक्षित र भरपर्दो बनाएको बताइएको छ ।

याडिया किनेसले अन्तर्राष्ट्रिय स्तरमा प्रतिष्ठित रेड इट डिजाइन अवार्डसमेत प्राप्त गरिसकेको छ । यस्तै, कुजु नेपाल प्रालिले याडिया किनेस इलेक्ट्रिक मोटरसाइकलको मूल्य ६ लाख ६० हजार रुपियाँ तोकेको छ ।