बागमतीको बजेटः आफ्नै मापदण्ड लत्याउँदै टुक्रे योजनाको ओइरो

मकवानपुर । बागमती प्रदेश सरकारले मापदण्ड विपरीत साना तथा टुक्रे योजनामा बढी बजेट केन्द्रित गरेको छ । आगामी आर्थिक वर्ष (२०८३/०८४) का लागि विनियोजन गरेको बजेटमा प्रदेश सरकारले आफ्नै नीति तथा निर्देशिकाको उल्लङ्घन गर्दै साना तथा टुक्रे आयोजनामा बजेट विनियोजन गरेको हो ।

प्रदेश सरकारले गत वैशाखमा बजेट तर्जुमाका लागि वार्षिक आयोजना प्रस्ताव तथा छनौट सम्बन्धी निर्देशिका, २०८३ सार्वजनिक गरेको थियो । उक्त निर्देशिका अनुसार भौतिक पूर्वाधार (सडक तथा पुल) निर्माणमा न्यूनतम ५० लाख र सामाजिक, आर्थिक तथा पर्यटकीय पूर्वाधार क्षेत्रमा न्यूनतम ३० लाख रुपैयाँ विनियोजन गर्ने मापदण्ड तोकेको भए तापनि बजेट पुस्तिकामा १० देखि २० लाख रुपैयाँका सयौँ टुक्रे योजना समावेश गरिएको छ ।