प्रतिपक्षको विरोधका बीच संसद् सञ्चालन
rajdhanidaily.com · Fri Sep 10 23:29:17 GMT 2021
काठमाडौं । संघीय संसद्को प्रतिनिधिसभामा शुक्रबार तीनवटा बैठक बसे । तीनवटै बैठकमा प्रमुख प्रतिपक्षी नेकपा एमालेका सांसद र मर्यादापालकबीच धकेलाधकेल चलिरह्यो । तर, सभामुख अग्नि सापकोटाले बैठकलाई सञ्चालन गरिरहे । त्यहीबीचमा अर्थमन्त्री जनार्दन शर्मा दौडिँदै रोस्ट्रम पुगे र विभिन्न अध्यादेश तथा विधेयक पेस गरे । एमाले सांसदहरूको रोस्ट्रम कब्जा गर्ने प्रयासलाई मर्यादापालकहरूले असफल पारिदिए ।
एमालेको अवरोध र नाराबाजीबीच सभामुख सापकोटाले शुक्रबारको प्रतिनिधि सभा बैठक चलाए । बैठक सुरु हुनासाथ एमाले सांसदहरूले नाराबाजी गर्दै बैठक अवरुद्ध गरेका थिए । पहिलोपटक सभामुख सापकोटाले बैठक १५ मिनेटका लागि रोकेका थिए । दोस्रो बैठकमा पनि एमाले सांसदहरूले नाराबाजी जारी राखे । उनीहरूको नाराबाजीबीच सभामुख सापकोटाले बैठक अघि बढाए । केपी शर्मा ओली सरकारले अध्यादेशमार्फत् ल्याएको बजेट संसद्मा पेस गर्न सभामुख सापकोटा अर्थमन्त्री जनार्दन शर्मालाई समय दिए । एमाले सांसदको नाराबाजीबीच संसद्को बहुमतले बजेटसम्बन्धी अध्यादेश स्वीकृत गरेको थियो ।
स्रोतमा पूरा पढ्नुहोस् (rajdhanidaily.com)