४८ करोडको नाङ्गेडाडा बृहत पम्पिङ खानेपानी आयोजना उद्घाटनमै सीमित

सिन्धुली । करिब २६ सय घरधुरीलाई खानेपानी सेवा उपलब्ध गराउने लक्ष्यसहित निर्माण गरिएको ‘नाङ्गेडाडा बृहत् पम्पिङ खानेपानी आयोजना’ उद्घाटन भएको एक वर्षभन्दा बढी समय बितिसक्दा पनि उपभोक्ताले घरमा पानी नपाएको गुनासो गरेका छन् ।

सुनकोसी गाउँपालिका–५ र ६ मा सञ्चालन भएको उक्त आयोजना सङ्घीय खानेपानी तथा ढल व्यवस्थापन आयोजना कार्यालय, रामेछापमार्फत कार्यान्वयन गरिएको हो । आयोजनाको निर्माणको जिम्मा मृत सञ्जिवनी निर्माण सेवाले पाएको थियो भने पेटी ठेकेदारका रूपमा एनएनके निर्माण सेवाले काम गरेको बताइएको छ । आयोजनामा सुनकोसी गाउँपालिका र उपभोक्ता समितिले समन्वय गरेका थिए भने नीतिगत जिम्मेवारी खानेपानी मन्त्रालयको रहेको बताइन्छ ।