अत्याधिक गर्मीका कारण धनगढीका विद्यालय बन्द

धनगढी- अत्यधिक गर्मी बढ्दै गएपछि धनगढी उपमहानगरपालिकाले आफ्नो क्षेत्रभित्रका सामुदायिक तथा संस्थागत विद्यालयमा चार दिन बिदा दिने निर्णय गरेको छ।

उपमहानगरपालिकाको शिक्षा शाखाले सूचना जारी गर्दै केही दिनयता बढ्दो गर्मीका कारण विद्यालयमा अध्ययनरत विद्यार्थीहरूको स्वास्थ्यमा प्रतिकूल असर पर्न सक्ने सम्भावनालाई मध्यनजर गर्दै उक्त निर्णय गरिएको जनाएको छ।

सूचनाअनुसार धनगढी उपमहानगरपालिका भित्र सञ्चालनमा रहेका सम्पूर्ण सामुदायिक तथा संस्थागत विद्यालयमा असार ९ गतेदेखि असार १२ गतेसम्म चार दिन पठनपाठन बन्द रहनेछ।

केही दिनयता अत्यधिक गर्मी बढेपछि हिँडडुलमा समेत समस्या भएको छ।

प्रकाशित मिति: सोमबार, असार ८, २०८३

१४:१२