बेलायती प्रधानमन्त्री स्टार्मरलाई राजीनामाको दबाब

काठमाडौं । बेलायतका प्रधानमन्त्री किएर स्टार्मरमाथि पद त्याग गर्न दबाब बढ्दै गएको छ । सत्तारूढ लेबर पार्टीभित्र असन्तुष्टि चुलिँदै गएको र केही नेताहरूले एन्डी बर्नह्यामलाई सम्भावित नयाँ नेतृत्वका रूपमा अघि सार्न थालेको अलजजिराले जनाएको छ ।

हालै भएको संसदीय उपनिर्वाचनमा लेबर पार्टीका नेता बर्नह्यामले जित हासिल गरेका थिए । उनले कट्टर दक्षिणपन्थी नेता नाइजेल फारेजको पार्टी ‘रिफर्म यूके’का उमेदवारलाई पराजित गरेका थिए । त्यसपछि प्रधानमन्त्री पदका लागि उनको सम्भावित दाबेदारीको चर्चा तीव्र बनेको छ ।

लेबर पार्टीभित्र स्टार्मरको नेतृत्वमाथि प्रश्न उठ्न थालेको बताइएको छ । केही सांसद र पार्टी नेताहरूले उनको नीतिप्रति असन्तुष्टि व्यक्त गरेका छन् । लन्डनको राजनीतिक वृत्तमा नेतृत्व परिवर्तनको सम्भावनाबारे चर्चा बढेको छ । तर, स्टार्मरले भने तत्काल पद छोड्ने कुनै संकेत दिएका छैनन् ।

सञ्चारकर्मीहरूसँग कुरा गर्दै स्टार्मरले दुई वर्षअघि जनताबाट प्राप्त जनादेशको स्मरण गर्दै आफू देशको सेवाका लागि निर्वाचित भएको बताए । उनले आफ्नो जिम्मेवारीबाट पछि नहट्ने स्पष्ट पारे ।

स्टार्मर आफ्नो अडानमा कायम रहे पनि पार्टीभित्र उनको राजनीतिक पकड कमजोर भएको चर्चा गरिएको छ । अर्कोतर्फ, बर्नह्यामलाई भविष्यको सम्भावित नेता मान्ने समूह सक्रिय देखिएको छ ।

सञ्चारमाध्यमहरूका अनुसार, ठूलो संख्यामा लेबर सांसदहरू नेतृत्व परिवर्तनको पक्षमा देखिएका छन् । व्यापारमन्त्री पिटर काइलले पनि स्टार्मरले राजनीतिक परिस्थितिको यथार्थ मूल्यांकन गर्नुपर्ने संकेत दिएका छन् ।

स्टार्मरले राजीनामा दिएमा दुई सम्भावना रहने बताइएको छ । नयाँ नेता चयन नभएसम्म उनी कार्यवाहक प्रधानमन्त्रीका रूपमा रहन सक्ने वा अर्को कुनै व्यक्तिलाई अन्तरिम प्रधानमन्त्रीको जिम्मेवारी दिइन सक्ने चर्चा गरिएको छ ।

लेबर पार्टीमा नेतृत्व परिवर्तनको प्रक्रिया

बेलायतको लेबर पार्टीको नेतृत्व परिवर्तन प्रक्रिया जटिल मानिन्छ । नयाँ नेतृत्वका दाबेदारले कम्तीमा २० प्रतिशत सांसदहरूको समर्थन जुटाउनुपर्छ । साथै, क्षेत्रीय लेबर संगठनहरू वा सम्बन्धित संस्थाहरूको समर्थन पनि आवश्यक हुन्छ ।

यस प्रतिस्पर्धामा पूर्वस्वास्थ्यमन्त्री वेस स्ट्रिटिङको नाम पनि चर्चामा छ । यदि स्टार्मर पदबाट हटेमा बेलायतले पछिल्लो १० वर्षमा सातौँ प्रधानमन्त्री पाउने छ ।

पछिल्ला केही महिनामा स्टार्मर सरकार विभिन्न विवादको सामना गरिरहेको छ । विशेषगरी कर नीति, सामाजिक सुविधा तथा सरकारका केही नीतिगत निर्णयमा गरिएको ‘यू–टर्न’ ले उनको लोकप्रियतामा असर परेको विश्लेषण गरिएको छ ।

यसैबीच, बर्नह्यामले लेबर पार्टीका लागि अहिले परिवर्तनको महत्त्वपूर्ण समय भएको बताएका छन् । उनले पानी, ऊर्जा तथा रेल सेवाको लागत घटाएर सर्वसाधारणलाई राहत दिने प्रतिबद्धता व्यक्त गरेका छन् ।

#प्रधानमन्त्री

#राजीनामा

#बेलायत

#किएर स्टार्मर