बेलायती प्रधानमन्त्री स्टार्मरले गरे राजीनामा दिने घोषणा

काठमाडौं । बेलायतका प्रधानमन्त्री किएर स्टार्मरले पदबाट राजीनामा दिने घोषणा गरेका छन् । १० डाउनिङ स्ट्रिटस्थित प्रधानमन्त्री निवासबाहिर राष्ट्रलाई सम्बोधन गर्दै स्टार्मरले पदबाट राजीनामाको घोषणा गरेका हुन् । उनले लेबर पार्टीको ‘नेता’ पदबाट समेत राजीनामा दिने घोषणा गरेका छन् ।

स्टार्मरले आफ्नो कार्यकालभर गरेका हरेक निर्णय र कदम पहिलो प्राथमिकतामा राखेर लिएको बताएका छन् ।

स्टार्मरको उत्तराधिकारी बन्ने प्रबल सम्भावना रहेका एन्डी बर्नह्याम हालै भएको मेकरफिल्ड उपनिर्वाचनमा विजयी भएका थिए । बर्नह्याम सोमबार सांसदका रूपमा शपथ ग्रहण गर्न वेस्टमिन्स्टर पुग्ने कार्यक्रम रहेको बीबीसीले जनाएको छ ।

स्टार्मरले सत्ताको सहज, व्यवस्थित र जिम्मेवार हस्तान्तरण सुनिश्चित गर्न आफूले सक्दो सहयोग गर्ने बताएका छन् । आफ्नो उत्तराधिकारीलाई पूर्ण समर्थन रहने प्रतिबद्धता व्यक्त गरेका छन् ।

उनले नयाँ नेतृत्वले दुई वर्षअघिको तुलनामा अझ बलियो, न्यायपूर्ण र सक्षम बेलायतको विरासतलाई अगाडि बढाउने विश्वास पनि व्यक्त गरे ।

यस क्रममा उनले विगत ६ वर्षदेखि आफ्नो राजनीतिक यात्रामा साथ दिने सहयोगीहरू, मित्रहरू, १० डाउनिङ स्ट्रिटका कर्मचारी तथा बेलायतको ‘असाधारण’ निजामती सेवाप्रति आभार व्यक्त गरे ।

उनले आफ्नी पत्नी भिकलाई आफ्नो राजनीतिक यात्राको सबैभन्दा बलियो साथ र आधारका रूपमा चित्रण गर्दै धन्यवाद व्यक्त गरे । साथै, आफ्ना सन्तानलाई आफ्नो जीवनको गर्व र खुसीको स्रोत बताउँदै उनीहरूका लागि अझ राम्रो पिता बन्न चाहेको उल्लेख गरे ।

स्टार्मरले आज बिहान बेलायती राजालाई भेटेर आफ्नो राजीनामाको निर्णयबारे जानकारी गराएको बताए ।

उनले लेबर पार्टीको राष्ट्रिय कार्यसमितिलाई नयाँ नेता चयनको प्रक्रिया सुरु गर्न र त्यसको समयतालिका तय गर्न आग्रह गरेका छन् । यसअनुसार जुलाई ९ देखि उमेदवारी दर्ता खुला हुनेछ । संसद्को ग्रीष्मकालीन बिदा सुरु हुनुअघि नै नयाँ नेता चयन गर्ने लक्ष्य राखिएको छ ।

त्यतिन्जेलसम्म आफू प्रधानमन्त्रीको जिम्मेवारीमा कायम रहने स्टार्मरले स्पष्ट पारेका छन् ।

#प्रधानमन्त्री

#राजीनामा

#बेलायत

#किएर स्टार्मर