व्यापार घाटा १६ खर्ब १६ अर्बमाथि, ११ महिनामा १९ खर्बको आयात

काठमाडौं । चालु आर्थिक वर्ष २०८२/८३ को पहिलो ११ महिनामा नेपालको कुल वैदेशिक व्यापार १४ प्रतिशत बढेको छ । भन्सार विभागको तथ्यांकअनुसार साउनदेखि जेठ मसान्तसम्मको अवधिमा कुल वैदेशिक व्यापार १४.७८ प्रतिशतले वृद्धि भई २१ खर्ब ७२ अर्ब ६ करोड ६१ लाख रुपैयाँ पुगेको छ ।

विभागका अनुसार, ११ महिनामा आयात १५.१६ प्रतिशतले बढेर १८ खर्ब ९४ अर्ब ९ करोड ८८ लाख रुपैयाँ पुगेको छ । अघिल्लो आर्थिक वर्षको सोही अवधिमा आयात १६ खर्ब ४४ अर्ब ७९ करोड ७५ लाख रुपैयाँ रहेको थियो ।

त्यसैगरी, निर्यात १२.२८ प्रतिशतले वृद्धि भई दुई खर्ब ७७ अर्ब ९६ करोड ७२ लाख रुपैयाँ पुगेको छ । अघिल्लो वर्षको सोही अवधिमा निर्यात दुई खर्ब ४७ अर्ब ५७ करोड दुई लाख रुपैयाँ रहेको थियो ।

आयात र निर्यातबीचको अन्तर अर्थात् व्यापार घाटा पनि १५.६७ प्रतिशतले बढेर १६ खर्ब १६ अर्ब १३ करोड १६ लाख रुपैयाँ पुगेको छ । अघिल्लो वर्षको सोही अवधिमा व्यापार घाटा १३ खर्ब ९७ अर्ब २२ करोड ७३ लाख रुपैयाँ रहेको थियो ।

तथ्यांकअनुसार आयात–निर्यात अनुपात ६.६४ बाट बढेर ६.८१ पुगेको छ । कुल वैदेशिक व्यापारमा निर्यातको हिस्सा भने १३.०८ प्रतिशतबाट घटेर १२.८० प्रतिशतमा झरेको छ ।

#आयात

#निर्यात

#भन्सार विभाग

#वैदेशिक व्यापार