गृह र रक्षामा कति बजेट?

सरकारले आगामी आर्थिक वर्ष २०८३/८४ का लागि गृह मन्त्रालय र रक्षा मन्त्रालयलाई बजेट विनियोजन गरेको छ। शुक्रबार संघीय संसद्को संयुक्त बैठकमा अर्थमन्त्री स्वर्णिम वाग्लेले प्रस्तुत गरेको आव २०८३/८४ को बजेटमा गृह मन्त्रालयलाई एक खर्ब आठ अर्ब ३२ करोड रुपैयाँ विनियोजन गरिएको छ।

आव २०८२/८३ को बजेटमा भने गृहको बजेट दुई खर्ब आठ अर्ब ६२ करोड रुपैयाँ थियो। यसपालि गृह मन्त्रालयको बजेट दायित्व महिला, बालबालिका, लैंगिक तथा यौनिक अल्पसङ्ख्यक र सामाजिक सुरक्षा मन्त्रालयमा सरेका कारण गृहको बजेट कम देखिएको हो। गत वर्षसम्म गृहले सामाजिक सुरक्षा भत्तासमेत व्यवस्थापन गर्ने भएकाले बजेट बढी जान्थ्यो। उक्त भत्ताको कुल दायित्व एक खर्ब १४ अर्ब थियो।