विपद् अघि–अघि, सरकार धेरै पछि

आकस्मिक आइपर्ने विपद्को प्रतिकार्य र उद्धार तत्काल गर्ने र दीर्घकालीन समाधानको बाटो खोज्न सरकार संवेदनशील हुन जरुरी छ।

हरेक वर्ष बर्खा लाग्छ। बाढीपहिरो आउँछ। भिरपाखा र पखेराहरू भत्कन्छन्। नदीको बाढीले बस्ती बगाउँछ। मान्छे बगाउँछ। पहिरोले पुर्छ। सरकारलाई यो सबै थाहा छ। सबैलाई थाहा छ। तर बर्सेनि बाढीपहिरोको त्रास घटेको छैन र धनजनको क्षति पनि घटेको छैन। बाढीपहिरो र विनाश नेपालमा नियमित आकस्मिकता नै हो। यो वर्षको मनसुन सुरु हुनासाथै पूर्वका जिल्लाहरूमा दर्जनौं ज्यान पहिरोले लियो। कैयौं अझै बेपत्ता छन्। यस्तो त्रास अहिले देशैभरि छ। मनसुन सक्रिय भइसकेको छ। विपद् बाजा बजाएर आउँदै भनिन्छ। तर बर्खा लागेपछि विपद् आउँछ भन्ने चाहिँ थाहा भइसकेको छ।