राप्रपाका तीन पूर्वअध्यक्षले भने– हामी मूकदर्शक बनेर बस्न सक्दैनौँ

काठमाडौं । राष्ट्रिय प्रजातन्त्र पार्टी (राप्रपा)का तीन पूर्वअध्यक्षले पार्टीको महाधिवेशन समयमै नहुने आशंका व्यक्त गरेका छन् । पूर्वअध्यक्षहरू पशुपतिशमशेर राणा, डा. प्रकाशचन्द्र लोहनी र कमल थापाले संयुक्त रूपमा विज्ञप्ति जारी गर्दै तोकिएको समय र निष्पक्ष रूपमा सम्पन्न नहुने आशंका गरेका हुन् ।

सोही आशंकाका कारण पछिल्लो समय केहीले पार्टी परित्याग गरिसकेको र कतिपयमा निराशा बढिरहेको विज्ञप्तिमा भनिएको छ । विज्ञप्तिमा भनिएको छ, “यस्तो परिस्थितिको समाधानका लागि पार्टी अध्यक्षको संयोजकत्वमा पूर्वअध्यक्षहरू समेत रहने गरी एक उच्चस्तरीय ‘स्टेरिङ कमिटी’ गठन गर्न गर्नु उपयुक्त हुनेछ भन्ने हाम्रो सुझाव हो । दुर्भाग्यवश, यस्ता रचनात्मक सुझावहरूलाई आत्मसात् गर्नुको सट्टा पार्टी निर्माण र सुदृढीकरणका लागि जीवनको महत्त्वपूर्ण समय, रगत र पसिना समर्पित गरेका पूर्वअध्यक्षहरूमाथि नै लक्षित गरी जिम्मेवार व्यक्तिहरूबाट लाञ्छना र आरोप लगाउने प्रवृत्ति देखिनु अत्यन्त दुःखद र अस्वीकार्य छ ।”

राप्रपाले आगामी मंसिर २६ गतेदेखि केन्द्रीय महाधिवेशन आयोजना गर्ने निर्णय गरेकोमा पूर्वअध्यक्षहरूले स्वागत गरेका छन् । महाधिवेशनलाई स्वच्छ, निष्पक्ष, विश्वसनीय र परिणाममुखी बनाउन विगतमा अध्यक्षकै उपस्थितिमा प्रस्तुत गरिएका सुझावहरूलाई गम्भीरतापूर्वक कार्यान्वयन गरिनुपर्ने उनीहरूको सुझाव छ ।

महाधिवेशनको मिति घोषणा भइसकेकाले पार्टीको स्थापित परम्परा र अभ्यासअनुसार केन्द्रीय समिति अब स्वतः ‘महाधिवेशन आयोजक समिति’मा रूपान्तरण भई सोही अनुरूप आफ्नो भूमिका निर्वाह गर्न अग्रसर हुनुपर्ने उनीहरूको सुझाव छ । ।

“पूर्वअध्यक्षहरूको अनुभव, योगदान र संस्थागत भूमिकाको सम्मान गर्दै राप्रपाको विधानले नै उहाँहरूलाई केन्द्रीय तहका महत्त्वपूर्ण समितिहरूमा पदेन सदस्यका रूपमा रहने व्यवस्था गरेको छ,” विज्ञप्तिमा भनिएको छ, “पार्टी कमजोर बन्दै गएको र कार्यकर्तामा निराशा बढिरहेको वर्तमान अवस्थामा हामी मूकदर्शक बनेर बस्न वा पलायन हुन सक्दैनौँ । हाम्रो कुनै व्यक्तिगत स्वार्थ, पदलोलुपता वा पूर्वाग्रह छैन । हामी कुनै गुट वा समूहको राजनीतिमा पनि संलग्न छैन । हाम्रो एक मात्र चाहना र चिन्ता भनेको हाम्रो जीवनकालमै पार्टी कमजोर वा पतन भएको देख्न नपरोस् भन्ने हो ।”

महाधिवेशन स्वच्छ, निष्पक्ष र लोकतान्त्रिक ढंगले सम्पन्न हुने भन्दै उनीहरूले पार्टी छाडेर गएकालार्ई पुनः फर्किन आग्रह गरे । निराश र अन्योलमा रहेका कार्यकर्ताहरूलाई नयाँ उत्साह, उच्च मनोबल र दृढ विश्वासका साथ महाधिवेशनको तयारीमा जुट्न आह्वान समेत गरेका छन् ।

#महाधिवेशन

#राप्रपा

#पूर्वअध्यक्ष