रास्वपा सचेतक क्रान्तिशिखा धितालको अभिव्यक्तिप्रति जेन-जी सहिद परिवारको आपत्ति

काठमाडौं- जेन-जी सहिद परिवारहरुले जेन-जी सहिद प्रथम स्मृति दिवसको कार्यक्रमप्रति रास्वपा सचेतक क्रान्तिशिखा धितालले दिएको अभिव्यक्तिप्रति आपत्ति जनाएको छ । जेन-जी सहिद परिवार कल्याणकारी समाज र घाइते जेन-जी नेपालले सोमबार सिंहदरबारमा दक्षिण गेटबाहिर प्रदर्शनसहित पत्रकार सम्मेलन गर्दै जेन-जी सहिद प्रथम स्मृति दिवस कार्यक्रमलाई अपमान हुनेगरी धितालले अभिव्यक्ति दिएको भन्दै आपत्ति जनाएको हो ।

सहिद परिवार र घाइतेहरूको त्याग तथा बलिदानलाई हल्का रूपमा लिएर सचेतक क्रान्तिशिखा धितालले सार्वजनिक रूपमा तल्ल स्तरको अभिव्यक्ति दिएको आरोप लगाउदै उनीहरुले सार्वजनिक माफी माग्नुपर्ने जनाएका छन् । जेन-जी सहिद परिवार कल्याणकारी समाजका सचिव ठाकुरनाथ गौतमले सहिद परिवारलाई कहिल्यै कुनै प्रकारको सहयोग वा साथ नदिएको तर उल्टै अपमान गर्ने अधिकार कसैलाई नभएको बताए ।