तीजमा रमाएका नारी

रातको अँध्यारो छिचोल्दै पशुपतिनाथका चारवटै ढोका बिहान ३ बजेदेखि खुला भए । पूर्वतिर आकाश उज्यालिन नपाउँदै आर्यघाट आसपासदेखि मन्दिर परिसर र दर्शनार्थीको लामसम्म रातो सारी, हरियो पोते, चुरा र मेहन्दीमा सजिएका महिलाको चहलपहल बढिसकेको थियो ।

कोही पतिको दीर्घायुको कामना गर्दै थिए, कोही आमाबुबाको सुस्वास्थ्य र परिवारको सुख–शान्तिका लागि प्रार्थना गर्दै थिए । कसैका आँखामा भक्तिको भाव थियो, कसैका ओठमा तीजका भाका । हरितालिका तीजले फेरि एकपटक पशुपतिनाथ परिसरलाई आस्था, प्रार्थना र नारी भावनाको साझा थलो बनाएको थियो ।