संघीयताको मर्म विपरित बजेट आएको गुनासो

कोशी प्रदेश सरकारले आगामी आर्थिक वर्ष २०८३/०८४का लागि ल्याएको बजेट संघीयताको मर्म विपरितको रहेको सत्तापक्षीय सांसदहरूले गुनासो गरेका छन् । सोमबारको प्रदेशसभा बैठकमा बजेट माथिको छलफलका क्रममा सांसदहरूले यस्तो गुनासो गरेका हुन् ।

एमाले सांसद सृजना राईले कोशी सरकारले ल्याएको बजेट संघीयताको मर्म विपरितको रहेको आरोप लगाइन् । उनले साना–साना आयोजनामा बजेट छरेर सरकारले प्रदेशको खिल्ली उडाएको बताइन् । उनले बजेट सन्तुलित र स्मार्ट भन्ने गरिए पनि त्यस्तो बजेट नआएको दाबी गरिन् । उनले भनिन् ‘प्रदेशको बजेट कुनै पनि दृष्टिबाट सन्तुलित र स्मार्ट देखिंदैन ।’