चुनावमा कांग्रेस समर्थक जेनजी अभियन्ता मिराज युटर्न : गगनको आलोचना, रास्वपालाई समर्थन

काठमाडौं– जेनजी अभियन्ता मिराज ढुङ्गानाले नेपाली कांग्रेसका महामन्त्री गगन थापालाई विगतमा दिएको राजनीतिक समर्थनप्रति सार्वजनिक रूपमा आत्मालोचना गरेका छन्। राष्ट्रिय स्वतन्त्र पार्टी (रास्वपा) को प्रथम महाधिवेशनका अवसरमा शुभकामना सन्देश दिँदै उनले पुराना दलहरूबाट अपेक्षित परिवर्तन सम्भव नभएको निष्कर्षमा पुगेको बताएका हुन्।

रास्वपा सभापति रवि लामिछाने र पार्टीप्रति शुभकामना व्यक्त गर्दै ढुङ्गानाले गगन थापाले रास्वपालाई पठाएको शुभकामना सन्देश उनैलाई ‘फरवार्ड’ गर्न मन लागेको टिप्पणी गरेका छन्। उनका अनुसार अहिले गगन थापालाई अन्य दललाई सुझाव दिनुभन्दा आफ्नै पार्टीलाई सुदृढ र व्यवस्थित बनाउने चुनौती बढी छ।

ढुङ्गानाले आफू बाल्यकालदेखि नै गगन थापाको प्रस्तुति र राजनीतिक शैलीबाट प्रभावित रहेको स्मरण गरेका छन्। कांग्रेसप्रति विशेष झुकाव नभए पनि लोकतान्त्रिक व्यवस्थामा गगन थापालाई महत्त्वपूर्ण पात्रका रूपमा हेरेको उनले बताएका छन्।

तर अहिले आएर गगन थापाले आफ्नै पार्टीलाई अपेक्षित दिशा दिन नसकेको उनको निष्कर्ष छ। उनले लेखेका छन्, “मैले गगन थापाज्यूले बनाउन खोज्नुभएको सुदृढ दललाई आशाको समर्थन पनि दिएको हो। तर आज यो बहुदलीय व्यवस्थामा म एउटा राष्ट्रिय स्वतन्त्र पार्टी मात्र देख्छु। गगन थापाले पार्टीलाई मिलाउन सक्नुभएन, यो म जस्तो लोकतन्त्र मान्ने व्यक्तिका लागि दुःखको कुरा हो।”

ढुङ्गानाले पुराना राजनीतिक शक्तिहरूमा अब नैतिक आकर्षण समाप्त हुँदै गएको दाबी गर्दै परिवर्तनको अपेक्षा त्यही संरचनाभित्रबाट पूरा हुन नसकेको बताएका छन्। उनले भनेका छन्, “पुरानासँग त्यो नैतिक आकर्षण छैन र पुरानोलाई सुधारेर नयाँ पार्न नसकेको देख्दा मैले गगन थापाज्यूलाई गरेको समर्थनप्रति आत्मालोचना गर्ने बाहेक विकल्प देखिनँ।”

उनले नेपाली राजनीतिमा अहिले देखिएको वैकल्पिक राजनीतिक रिक्तता भर्न नयाँ राष्ट्रवादी शक्तिको आवश्यकता रहेको समेत औँल्याएका छन्। ढुङ्गानाको यो अभिव्यक्ति रास्वपाको महाधिवेशनका बीचमा सार्वजनिक भएकाले राजनीतिक वृत्तमा विशेष चासोका साथ हेरिएको छ।

प्रतिक्रिया दिनुहोस्