पोखरा लेकसाइड नजिकै दुर्घटना, एक युवकको मृत्यु

पोखरा । पोखरा महानगरपालिका–६ लेकसाइड नजिकै मोटरसाइकल दुर्घटना हुँदा युवकको मृत्यु भएको छ भने युवती गम्भीर घाइते भएकी छन् ।

बुलौंदीको ओरालोमा शनिबार राति ग९प ९४२५ नम्बरको मोटरसाइकल चालकले नियन्त्रण गुमाउँदा डिभाइडरमा ठोक्किएर दुर्घटना भएको प्रहरीले जनाएको छ ।

दुर्घटनामा चालक पोखरा ३३ बागमाराका २३ वर्षीय विवश मल्ल ठकुरीको मृत्यु भएको हो । टाउको र छातिमा चोट लागेका उनको उपचारका क्रममा गण्डकी मेडिकल कलेजमा मृत्यु भएको ट्राफिक प्रहरी कार्यालय कास्कीका प्रमुख इन्स्पेक्टर अजित कुमार देवकोटाले जानकारी दिए ।

उनका अनुसार मोटरसाइकलको पछाडि सवार सिन्धुली कमलामाई नगरपालिका ९ घर भई काठमाडौँ मुलपानी बस्दै आएकी १७ वर्षीया रविना ढुङ्गेल गम्भीर घाइते भएकी छन् । उनको टाउको र अनुहारमा चोट लागेको छ । उनको गण्डकी मेडिकल कलेजमा उपचार भइरहेको देवकोटाले बताए ।