घाउमा नुन छर्किएजस्तो प्रस्ताव स्वीकार्य छैन: प्रकाशशरण महत

काठमाडौं । नेपाली कांग्रेसका नेता डा. प्रकाशशरण महतले पार्टीभित्र देखिएको विवाद समाधानका लागि संस्थापन पक्षले गम्भीर राजनीतिक पहल नगरेको आरोप लगाएका छन् । उनका अनुसार विवाद समाधानका नाममा सामाजिक सञ्जाल र सञ्चारमाध्यममार्फत प्रचारबाजी बढी गरिएको छ भने वास्तविक संवाद र सहमतिको प्रयास भएको छैन ।

सोमबार चुनदेवीमा आयोजित पत्रकार सम्मेलनमा महतले पूर्वसभापति शेरबहादुर देउवा पक्षबाट आफूहरूसँग विवाद समाधानका लागि कुनै ठोस संवाद नभएको बताए । उनका अनुसार संस्थापन पक्षले १४औँ महाधिवेशनबाट निर्वाचित भएर हाल बाहिर रहेका नेताहरूलाई वडा अधिवेशनमा सहभागी भए विशेष अधिवेशनमार्फत समेट्ने प्रस्ताव गरेको छ, तर उक्त प्रस्ताव स्वीकार्य नभएको उनको भनाइ छ ।