त्रिवि राजनीतिशास्त्र विभागका प्रमुख कँडेलविरुद्ध उजुरीको चाङ

काठमाडौं । त्रिभुवन विश्वविद्यालयअन्तर्गत राजनीतिशास्त्र विभागका प्रमुखविरुद्ध अख्तियार दुरुपयोग अनुसन्धान आयोग र त्रिवि उपकुलपति कार्यालयसम्म उजुरी परेका छन् । राजनीतिशास्त्रका विभाग प्रमुख ईश्वरीप्रसाद कँडेलविरुद्ध झन्डै एक दर्जन उजुरी परेको छ । यतिखेर कँडेल उजुरीको जवाफ लेख्दैमा हैरानी भएका छन् ।

विभागमा बसेर अनियमितता गरेको र विषयगत शिक्षकले दिएको नम्बर घटबढ गरेर कीर्ते काम गरेको लगायत एक दर्जन विषयमा प्रमुख कँडेलविरुद्ध उजुरी परेको हो । परीक्षाको उत्तरपुस्तिका घरमा लिएर गएर आफूअनुकूलको विद्यार्थीलाई सहज वातावरण बनाउने काममा सक्रिय रहेको भन्दै अख्तियार दुरुपयोग अनुसन्धान आयोग र उपकुलपति कार्यालयमा उजुरी परेको छ । आयोगका अनुसार दुई उजुरीको विषयमा छानबिनका लागि त्रिवि राजनीतिशास्त्र विभागको प्रमुखलाई पत्र पठाइसकेको जनाएको छ । उजुरी परेपछि अख्तियार र उपकुलपति कार्यालयबाट आउने पत्रको जवाफ दिनुपर्दा कँडेलले दिक्दारी व्यक्त गरेका छन् ।