रेबिज विरुद्धको खोप देशभर हाहाकार, मृत्युदर बढ्ने खतरा

८ असार, काठमाडौं । काभ्रेपलाञ्चोकका ४० वर्षीय विकास बजगाईं आइतबार रेबिज विरुद्धको खोप (एआरभी) लगाउन करिब ३५ किलोमिटर यात्रा गरी काठमाडौंको टेकुस्थित शुक्रराज ट्रपिकल तथा सरुवा रोग अस्पताल पुगे ।

उनलाई शनिबार घर नजिकै कुकुरले टोकेको थियो । उनी सुरुमा नजिकैको शीर मेमोरियल अस्पताल पुगे । तर त्यहाँ खोप उपलब्ध थिएन । त्यसपछि धुलिखेलस्थित सरकारी स्वास्थ्य संस्था हुँदै अन्य सरकारी स्वास्थ्य संस्थामा खोजी गरे । तर कतै पनि खोप पाएनन् ।