प्रधानमन्त्रीले सच्याए विवादित अभिव्यक्ति, चीन र भारतसँग रणनीतिक सम्बन्ध आवश्यक

काठमाडौँ । नेपालमा नयाँ पार्टी रास्वपाको सरकार बनेदेखि दुई छिमेकी मुलुकसँगको सम्बन्ध कस्तो रहला भन्ने चासो सबैतिर देखिन्छ । लिपुलेक–लिम्पियाधुरा सीमा विवाद बल्झिएको बेला चीन र भारतले नेपालको सहमतिविना लिपुलेक पास खुला गर्नु र त्यहीबेला प्रधानमन्त्री बालेनको विवादास्पद सीमा अभिव्यक्ति आउनुले केही समय राम्रै तरंग ल्यायो । प्रधानमन्त्रीले गत जेठ १७ गते संसदमा दिएको विवादास्पद अभिव्यक्ति असार ७ गते रास्वपा महाधिवेशनका क्रममा सच्याउँदै कालापानी–लिपुलेक नेपालकै भएको तथ्य प्रमाण हामीसँग रहेको बताएका छन् ।

कालापानी र लिपुलेक लगायत विवादित क्षेत्रका विषयमा छिमेकी मुलुकसँग तथ्यपरक संवाद गर्न सरकार तयार रहेको बताउँदै उनले भारतसँगको सीमा विवाद समाधानका लागि कुनै तेस्रो पक्ष वा वैदेशिक मध्यस्थकर्ता (बेलायत)को आवश्यकता नरहेको समेत प्रस्ट पारे । नेपालले आफ्ना छिमेकीहरूसँग प्रत्यक्ष संवादमार्फत नै समस्याको समाधान खोज्ने उनको भनाइ थियो । यद्यपि जेठ १७ गतेको सम्बोधनमा उनले सीमा विवादबारे बेलायत सरकारसँग पनि कुरा गरेको बताएका थिए, त्यसबारे भारतले खण्डन गर्दै तेस्रो पक्षको उपस्थिति स्वीकार्य नहुने बताएको थियो ।