बसमा एकैछिनको चिनजानमा ठगिइन् महिला, बिहे गरी भारत लगेर बेच्ने प्रयास !

काठमाण्डौ – नचिनेको व्यक्तिसँग एकैछिनको चिनजानको भरमा एक महिला ठगिन पुगेकी छन् । काठमाण्डौबाट पोखरा जानेक्रममा बसमा भएको भेटमा ती महिलालाई बिहे गरी भारतमा बेच्ने प्रयास भएको छ । उनी भारत पुगे पनि बेचिनबाट भने जोगिएकी छन् ।

नवलपुरको कावासोती घर भएका दुर्गाबहादुर पौडेल क्षेत्रीको विश्वासमा पर्दा ती महिला ठगीमा परेकी हुन् । प्रहरीको मानब बेचबिखन अनुसन्धान ब्युरोका अनुसार ती महिला काठमाण्डौबाट साथी भेट्न पोखरा जाने क्रममा सँगै बसको सिटमा पौडेल भेटिएका थिए । यात्राकै क्रममा उनीहरुबीच कुरा हुँदै जाँदा प्रलोभनमा पारी विवाह गरेर महिलालाई बिक्रीको प्रयास गरेको पाइएको छ ।