कर्णालीका यातायात कार्यालयबाट जेठसम्म ३१ करोड राजस्व संकलन

सुर्खेत । कर्णाली प्रदेशका यातायात व्यवस्था कार्यालय तथा सेवा कार्यालयहरूले चालु आर्थिक वर्षको जेठ मसान्तसम्म ३१ करोड २३ लाख ५१ हजार ८७० रुपैयाँ राजस्व संकलन गरेका छन् ।

प्रदेशको भौतिक पूर्वाधार तथा शहरी विकास मन्त्रालयले सार्वजनिक गरेको जेठसम्मको राजस्व विवरणअनुसार सुर्खेत, जुम्ला र रुकुम पश्चिमस्थित कार्यालयहरूले उक्त रकम संकलन गरेका हुन् ।

मन्त्रालयको तथ्यांकअनुसार ती कार्यालयले जेठमा मात्रै २ करोड ४७ लाख ४४ हजार ५०४ रुपैयाँ राजस्व उठाएका छन् । गत आव २०८१/८२ मा यी कार्यालयहरूले ३१ करोड ३६ लाख ६४ हजार १७१ रुपैयाँ राजस्व संकलन गरेका थिए । चालु आवको जेठमा मसान्तसम्मको संकलन गत वर्षको कुल राजस्वको हाराहारीमा पुगेको देखिएको छ ।

राजस्व संकलनमा सवारीसाधन करले सबैभन्दा ठूलो हिस्सा ओगटेको छ । सवारीसाधन कर शीर्षकबाट गत आवमा २५ करोड ९६ लाख ४२ हजार ६४० रुपैयाँ राजस्व उठेको थियो भने चालु आवको वैशाखसम्म २० करोड ८ लाख ८७ हजार ३२ रुपैयाँ संकलन भएको थियो । जेठमा थप १ करोड ४८ लाख ५ हजार ९७६ रुपैयाँ उठेसँगै यो शीर्षकबाट कुल संकलन २१ करोड ५६ लाख ९३ हजार ८ रुपैयाँ पुगेको छ ।

जुम्लास्थित यातायात व्यवस्था सेवा कार्यालयले सवारीसाधन करबाट वैशाखसम्म ६२ लाख ६४ हजार १७४ रुपैयाँ राजस्व उठाएको थियो । जेठमा ११ लाख १ हजार ५८ रुपैयाँ थपिएपछि कुल संकलन ७३ लाख ६५ हजार २३२ रुपैयाँ पुगेको छ । यस्तै रुकुमपश्चिमको चौरजहारीस्थित सेवा कार्यालयले वैशाखसम्म २ करोड ४५ लाख ३५ हजार २१ रुपैयाँ संकलन गरेकोमा जेठमा २१ लाख १६ हजार २६० रुपैयाँ थपिएपछि कुल २ करोड ६६ लाख ५१ हजार २८१ रुपैयाँ राजस्व संकलन गरेको छ ।

चालु आवको जेठसम्म सुर्खेतस्थित यातायात व्यवस्था २६ करोड ७० लाख १५ हजार ३४४, जुम्लास्थित सेवा कार्यालयले १ करोड ४७ लाख ७३ हजार २०५ र रुकुमपश्चिमस्थित सेवा कार्यालयले ३ करोड ५ लाख ६३ हजार ३२१ रुपैयाँ राजस्व संकलन गरेका छन् ।

#कर्णाली प्रदेश

#सवारीसाधन कर

#विवशकुमार सेजुवाल