ऐतिहासिक रेकर्ड बनाउन पेनाल्टीमा चुके मेसी

काठमाडौँ । फिफा विश्वकप २०२६ अन्तर्गत समूह ‘जे’ को खेलमा अर्जेन्टिनाका कप्तान लियोनेल मेसी विश्व कीर्तिमान बनाउने सुवर्ण अवसरबाट चुकेका छन् । सोमबार राति नेपाली समय अनुसार १०ः४५ बजे अमेरिकाको डालस स्टेडियममा सुरु भएको अस्ट्रियाविरुद्धको खेलमा मेसीले पेनाल्टीमार्फत गोल गर्न नसक्दा उक्त ऐतिहासिक अवसर गुमेको हो ।

खेल सुरु भएको ८ औँ मिनेटमा ‘भिएआर’ को रिभ्युपछि रेफ्रीले अर्जेन्टिनालाई पेनाल्टी प्रदान गरेका थिए । अर्जेन्टिनाका लागि सुरुवाती अग्रता लिने र मेसीका लागि इतिहास रच्ने यो निकै सहज अवसर थियो । तर, खेलको ९ औँ मिनेटमा मेसीले प्रहार गरेको पेनाल्टी गोलमा परिणत हुन सकेन । मेसीको प्रहार चुकाएसँगै स्टेडियममा उपस्थित हजारौँ समर्थकहरू स्तब्ध बनेका थिए ।

यो गोल मेसीका लागि मात्र एक गोल थिएन, यो विश्व फुटबल इतिहासकै एक ठुलो रेकर्ड तोड्ने अवसर थियो । हाल मेसी र जर्मनीका पूर्व स्ट्राइकर मिरोस्लाभ क्लोज १६–१६ गोलसहित विश्वकपमा सर्वाधिक गोल गर्ने खेलाडीको सूचीमा संयुक्त रूपमा शीर्ष स्थानमा छन् ।

यदि आजको पेनाल्टी गोल भएको भए मेसी १७ गोलका साथ विश्वकप इतिहासमा सर्वाधिक गोल गर्ने एक्लो खेलाडी बन्ने थिए । सूचीमा मेसी र क्लोजपछि ब्राजिलका रोनाल्डो (१५ गोल) तेस्रो स्थानमा छन् । मेसीले सन् २००६ देखि २०२२ सम्मका ५ वटा विश्वकप खेल्दै १६ गोल पुरा गरेका हुन् ।