करेन्ट लागेर मृत्यु भएका परिवारलाई आर्थिक सहयोग गरिने

दाङमा करेन्ट लागेर एकै घरका तीनजनाको मृत्यु भएपछि सरकारले आर्थिक सहयोग गर्ने भएको छ । लुम्बिनी प्रदेश सरकार गृह मन्त्रालयबाट प्रत्येकलाई एक/एक लाख, जिल्ला विपद् व्यवस्थापन समितिबाट प्रत्येकलाई दुई/दुई लाख, नेपाल विद्युत् प्राधिकरण लमहीद्वारा जनही पाँच/पाँच लाख रुपैयाँ सहयोग गर्ने सहमति भएको छ ।

पीडित र पीडक पक्षबीच आज भएको सहमतिअनुसार मृतक परिवारका सदस्य राप्ती गाउँपालिका–३ मसुरिया निवासी लालबहादुर केसीलाई योग्यताबमोजिम नेपाल विद्युत् प्राधिकरणमा रोजगारको व्यवस्थापन गर्ने सहमति भएको छ ।