संरक्षण क्षेत्रमा गैरकानुनी संरचना

प्रकृति संरक्षणका धेरै ढाँचामध्ये अन्नपूर्ण क्षेत्र एउटा भिन्न किसिमको क्षेत्र हो, जहाँ मानिसको बसोबास सँगसँगै संरक्षण पनि छ। राष्ट्रिय निकुञ्ज वा आरक्षहरूमा जस्तो बस्ती नै खाली गरी यहाँ संरक्षण क्षेत्र बनाइएको छैन। यसैले नै अन्नपूर्ण संरक्षण क्षेत्र गण्डकी प्रदेशका आधा दर्जन जिल्लामा फैलिएको छ, १५ गाउँपालिका यसको क्षेत्र हो।

संरक्षणका मामलामा अन्नपूर्णले उत्कृष्ट सफलता पनि हासिल गरेको छ। वन्यजन्तु र वन तथा वनस्पति संरक्षण लोभलाग्दो छ। यो क्षेत्र पदयात्रा पर्यटनका लागि विश्वभर कहलिएको छ। पदयात्रा गर्न आउने पर्यटक लक्ष्य गरी संरक्षण क्षेत्रका विभिन्न ठाउँमा खानेबस्ने सुविधाका लागि रेस्टुरेन्ट र होटल खुलेका छन्। तर अधिकतर अवैध छन् अर्थात् अनुमति नलिई मनखुसी निर्माण गरिएका छन्।