अङ्ग्रेजी भाषा परीक्षामा थोरै मात्र उत्तीर्ण

इजरायलका दीर्घकालीन स्याहार केन्द्रमा नेपाली स्वास्थ्य सहायक (केयरगिभर) लागि लिइएको अङ्ग्रेजी भाषा परीक्षामा एक हजार दुई सय जना मात्रै उत्तीर्ण भएका छन् । केयरगिभरका लागि आवेदन दिएका १५ हजारभन्दा बढी आवेदकमध्ये एक हजार २३१ जना मात्रै पास भएका हुन् ।

केयरगिभरको आवेदन दिनका लागि भाषा परीक्षाको स्पिकिङमा ‘बी वान’ अनिवार्य ल्याउनुपर्ने व्यवस्था छ । सोही अनुसार त्रिपुरेश्वरमा सिआइआइएन इन्टरनेसनल क्वालिफिकेसनमार्फत अङ्ग्रेजी भाषा परीक्षा लिइएको थियो । जसमा १५ हजार ६२६ जनाले भाषा परीक्षा दिएकामा उत्तीर्ण हुने ७.८ प्रतिशत मात्र छन् ।वैदेशिक रोजगार विभागले न्यून सङ्ख्यामा अङ्ग्रेजी भाषा परीक्षा पास भएको प्रतिवेदन आएको जनाएको छ । इजरायलले दुई हजार तीन सय केयरगिभरका लागि आवेदन माग गरेको थियो । त्यसका लागि बी वान तहको अङ्ग्रेजी भाषा पास गरेको प्रमाणपत्र अनिवार्य गरेको थियो ।

मागभन्दा कम मात्रै भाषा परीक्षामा पास भएपछि अब के गर्ने भन्ने विषयमा विभागले छलफल थालेको छ । यसअघि २०८१ लगिएका केयरगिभरको हकमा ब्रिटिस काउन्सिलबाट अङ्ग्रेजी भाषा परीक्षा लिइएको थियो ।

यस पटक इजरायलस्थित पीवाले नै तोकेर सिआइआइएन इन्टरनेसनललाई जिम्मेवारी दिइएको थियो । सोही अनुसार प्रतिआवेदकबाट पाँच हजार रुपियाँ शुल्क लिएर अङ्ग्रेजी भाषा परीक्षा लिइएको थियो ।