घट्दै हाटबजार, हराउँदै स्थानीय उत्पादनको रौनक

रामेछाप । बुधबार बिहान, लिखु तामाकोसी गाउँपालिका–३ स्थित धोबी बजारमा केही व्यापारीहरू आफ्नो सामान मिलाउँदै छन् । कतै तराईबाट ल्याइएका तरकारीका बोरा छन, कतै कस्मेटिकका साना स्टल । केही पसलमा लुगा र जुत्ता झुण्ड्याइएका छन् । तर, बजारमा छैन त्यो पुरानो चहलपहल, छैन किनमेल गर्नेहरूको भीड, गाउँघरका मानिसहरूको उत्साहपूर्ण जमघट पनि छैन् ।

कुनै बेला यही धोबी हाटमा खुट्टा टेक्न पनि मुस्किल पथ्र्यो । अहिले भने बजार सुनसानजस्तै देखिन्छ । हाटबजार नेपाली ग्रामीण जीवनको आर्थिक र सामाजिक केन्द्र थियो । किसानहरूले आफ्ना खेतबारीमा उत्पादन भएका वस्तु बिक्री गर्थे, घरायसी आवश्यक सामान किन्थे र टाढाटाढाबाट आएका आफन्त तथा साथीभाइसँग भेटघाट गर्थे । हाट केवल व्यापार गर्ने ठाउँ थिएन, गाउँ समाजको सम्बन्ध जोड्ने साझा चौतारी पनि थियो ।