इराकलाई हराउँदै साविक उपविजेता फ्रान्स विश्वकपको नकआउट चरणमा

काठमाडौं । साविक उपविजेता फ्रान्स फिफा विश्वकप २०२६ को नकआउट चरणमा प्रवेश गरेको छ । अमेरिकाको फिलाडेल्फिया स्टेडियममा भएको समूह चरणको खेलमा एसियाली टोली इराकलाई ३–० गोल अन्तरले सहजै पराजित गर्दै फ्रान्सले एक खेल अगावै अन्तिम १६ मा स्थान सुरक्षित गरेको हो ।

लगातार दोस्रो जितसँगै ६ अंक जोडेर फ्रान्स समूहको शीर्ष स्थानमा छ । यसअघि आफ्नो पहिलो खेलमा फ्रान्सले सेनेगललाई ३–१ ले पराजित गरेको थियो । खेलको सुरुवाती समयदेखि नै इराकविरुद्ध हाबी भएको फ्रान्सले चौधौँ मिनेटमै खाता खोलेको थियो । कप्तान किलियन एम्बाप्पेले उत्कृष्ट गोल गर्दै टोलीलाई सुरुवाती अग्रता दिलाएका थिए । पहिलो हाफको खेल सकिएलगत्तै भारी वर्षा भएपछि खेल झण्डै २ घण्टासम्म रोकिएको थियो ।

खेल पुनः सुरु भएपछि पनि फ्रान्सले आफ्नो आक्रामक लयलाई कायम राख्यो । ५४औँ मिनेटमा कप्तान एम्बाप्पेले व्यक्तिगत दोस्रो गोल गर्दै फ्रान्सको अग्रता दोब्बर पारे । ६६औँ मिनेटमा उस्मान डेम्बेलेले गोल गर्दै फ्रान्सलाई ३–० को जित दिलाए ।

इराकमाथिको यो जितसँगै फ्रान्स नकआउट चरणमा पुग्ने निश्चित भएको छ । यस समूहमा फ्रान्स ६ अंकसहित शीर्ष स्थानमा रहँदा एक खेल खेलेको नर्वे ३ अंकका साथ दोस्रो स्थानमा छ । समान खेल खेलेका सेनेगल र इराक भने अंकविहीन रहँदै तालिकाको पुछारमा छन् ।