संन्यासको त्यो आँसुदेखि कीर्तिमानको शिखरसम्म...

सन् २०१६ को त्यो क्षण फुटबल इतिहासकै सबैभन्दा भावुक र निराशाजनक क्षणमध्ये एक थियो, जब कोपा अमेरिकाको फाइनलमा चिलीसँग पराजित भएपछि अर्जेन्टिनाका महान् खेलाडी लियोनेल मेसीले अन्तर्राष्ट्रिय फुटबलबाट संन्यासको घोषणा गरेका थिए ।

पेनाल्टी सुटआउटमा आफैँले प्रहार गरेको बल मिस भएपछि नौ वर्षमा चौथो पटक ठुलो प्रतियोगिताको फाइनलमा अर्जेन्टिना पराजित हुँदा मेसीले त्यो पीडा सहन सकेका थिएनन् । उनले आँसु थाम्दै मेरो लागि राष्ट्रिय टोलीको यात्रा यहीँ सकियो, मैले सकेको सबै गरेँ र च्याम्पियन बन्न नसक्दा निकै चित्त दुखेको छ भन्दै मैदानबाट बिदा लिने निर्णय सुनाएका थिए ।