मनाङमा अस्पताल भवनको शिलान्यास, भारत सरकारको ५ करोड ६० लाख सहयोग

मनाङ । नेपालको हिमाली जिल्ला मनाङमा नयाँ अस्पताल भवनको शिलान्यास गरिएको छ । गण्डकी प्रदेश अन्तर्गतको मनाङ जिल्लास्थित नासो गाउँपालिका वडा नम्बर ५ मा निर्माण हुन लागेको उक्त अस्पताल भवनको आज एक विशेष समारोहका बिच संयुक्त रूपमा शिलान्यास गरिएको हो ।

काठमाडौँस्थित भारतीय राजदूतावासका नियोग उप-प्रमुख डा.राकेश पाण्डे र नासो गाउँपालिकाका अध्यक्ष धनबहादुर गुरुङले संयुक्त रूपमा यो भवनको जग बसालेका हुन् । यो अस्पताल भवन भारत सरकारको आर्थिक सहयोगमा निर्माण हुन लागेको हो ।