कतारको रास लाफान औद्योगिक क्षेत्रमा विष्फोट, १२ भारतीयसहित १३ जनाको मृत्यु

काठमाडौं । कतारको एक फ्याक्ट्रीमा भएको भीषण विष्फोटमा परी १२ जना भारतीय नागरिकसहित १३ जनाको मृत्यु भएको छ। कतारको प्रमुख औद्योगिक क्षेत्र रास लाफान इन्डस्ट्रियल सिटीमा अवस्थित एक फ्याक्ट्रीमा आइतबार राति उक्त विष्फोट भएको हो।

घटनाको पुष्टि गर्दै दोहास्थित भारतीय दूतावासले सामाजिक सञ्जाल ‘एक्स’ मा एउटा पोस्ट सार्वजनिक गरेको छ। दूतावासका अनुसार कतारका सरकारी अधिकारीहरूले आइतबार राति रास लाफानमा भएको उक्त औद्योगिक दुर्घटनामा १२ जना भारतीय नागरिकको मृत्यु भएको आधिकारिक रूपमा पुष्टि गरेका हुन्।

भारतीय दूतावासले कतारी अधिकारीहरूलाई उद्धृत गर्दै उक्त घटनामा परी घाइते भएका अन्य व्यक्तिहरूको स्वास्थ्य स्थिति हाल स्थिर रहेको र उनीहरूको अस्पतालमा उपचार चलिरहेको जनाएको छ। कतारमा हाल रोजगारीका सिलसिलामा आठ लाखभन्दा बढी भारतीय कामदारहरू कार्यरत छन्।

यस दुःखद् घडीमा दूतावासले घटनाबाट प्रभावित भएका भारतीय नागरिक र उनीहरूका परिवारको सहयोगका लागि कतारका अधिकारीहरूसँग नियमित र सघन सम्पर्क भइरहेको बताएको छ। दूतावासले कानुनी प्रक्रियाहरू छिटो पूरा गरी मृतकहरूको शवलाई चाँडोभन्दा चाँडो भारत पठाउने व्यवस्था सुनिश्चित गर्नका लागि उच्च प्राथमिकताका साथ काम गरिरहेको जानकारी दिएको छ।

यसअघि सोमबार आयोजित एक विशेष ‘प्रेस ब्रिफिङ’ का क्रममा कतारका ऊर्जामन्त्री साद बिन श्रैदा अल–काबीले औद्योगिक क्षेत्रमा भएको उक्त घटनामा भारतीय र पाकिस्तानी मूलका गरी कुल १३ जनाको ज्यान गएको पुष्टि गरेका थिए।

दुर्घटनाको वास्तविक कारण र फ्याक्ट्रीमा भएको प्राविधिक चुहावट वा कमजोरीबारे कतारी सुरक्षा निकाय र सम्बन्धित विभागहरूले थप अनुसन्धान गरिरहेका छन्। विष्फोटका कारण सो औद्योगिक क्षेत्रमा केही समयका लागि सुरक्षा सतर्कता उच्च पारिएको थियो।