गहुँबालीको कालो सिन्दुरे रोगको प्रजाति फेला

काठमाण्डौ – नेपालमा गहुँबालीमा लाग्ने कालो सिन्दुरे रोगको प्रजाति 'यूजी–९९' को 'टीटीकेटीटी' पहिलोपटक पत्ता लागेको छ । राष्ट्रिय बाली रोग विज्ञान अनुसन्धान केन्द्र खुमलटारका वैज्ञानिकले पहिलोपटक यो रोगको प्रजाति नेपालमा पनि देखिएको पुष्टि गरेका हुन् ।

केन्द्रका प्रमुख सुरज बैद्यकाअनुसार वैज्ञानिकहरुले गएको कात्तिक २२ गते देलखाको दांगढुंगे र खरिढुंगाका क्षेत्रमा गाईवस्तुको आहाराको लागि हरियो घाँसको रुपमा खेती गरिएको गहुँको बोटमा रोगको सर्वेक्षणका क्रममा यो रोगको प्रजाति भेटिएको हो । ती ठाउँका दुईवटा गहुँबारीबाट संकलित नमूनालाई 'ग्लोबल रष्ट रिसर्च सेन्टर' डेनमार्कको प्रयोगशालामा परीक्षण गर्दा 'टीटीकेटीटी' नामक 'यूजी–९९' को प्रजाति देखा परेको हो ।