ग्रेटर घण्टाघर निर्माण सुरु

वीरेन्द्रनगर नगरपालिकाले घण्टाघर क्षेत्रलाई व्यवस्थित र विकसित गर्ने उद्देश्यले विभिन्न संरचनासहितको ‘ग्रेटर घण्टाघर’ निर्माणको काम भइरहेको छ ।

घण्टाघर पार्क र पार्कभन्दा बाहिरको आसपासदेखि नगर कार्यपालिका कार्यालय क्षेत्रसम्म समेटेर पूर्वाधार निर्माणको काम सुरु गरिएको छ । नगरपालिकाका इन्जिनियर हरि केसीले कर्णालीका १० जिल्लाको सांस्कृतिक तथा पर्यटकीय स्थलको झल्को दिने गरी ‘ग्रेटर घण्टाघर’ योजना अघि सारेको बताउनुभयो ।

ग्रेटर घण्टाघर बनाउन व्यवस्थित पार्क, फोरलेन सडक, पार्टी र अन्य कार्यका लागि सभाहल, पारिवारिक रूपमा बस्न पार्कलाई व्यवस्थापन गर्ने लक्ष्य राखेको छ । नगरपालिकाले आर्थिक वर्ष २०७८/७९ देखि नै काम आरम्भ गरेको हो । घण्टाघर पार्कभित्र आकर्षक संरचना बनाइने छ । पश्चिमतर्फको खाली भागमा खुलापार्क बनाइएको छ । त्यसबाहेकका अन्य काम पनि धमाधम भइरहेको छ । नेकपा (एमाले) सुर्खेतको पार्टी कार्यालयदेखि उत्तरपूर्वमा यसअघि नगरपालिकाले खाली गराएको क्षेत्रमा मण्डलासहितको पार्क निर्माण गर्न लागिएको छ । अहिले मण्डला निर्माणको काम अन्तिम चरणमा पुगेको इन्जिनियर केसीले जानकारी दिनुभयो ।

घण्टाघर पार्कलाई नगरपालिकाले संरक्षण र पर्यटकीय स्थल बनाउने उद्देश्यले प्राथमिकतामा राखेर अघि बढाएको छ । आर्थिक वर्ष २०७९/८० मा घण्टाघरको पुरानो पर्खाल हटाएर नयाँ पर्खाल निर्माण गरिएको थियो । दुई चरणमा ठेक्का व्यवस्थापन गरेर निर्माण थालिएको घण्टाघरको उत्तर, पश्चिम र दक्षिणतर्फको काम ४० लाख ४७ हजार आठ सय १९ रुपियाँ लागतमा अघिल्लो वर्ष सकिएको थियो ।