मेलाको बचत रकम पर्यटन विकासमा

म्याग्दी – अन्नपूर्ण गाउँपालिका-१ स्थित मणिबराही युवा क्लबले दसैँ मेलाबाट बचत भएको २० लाखभन्दा बढी रकम स्थानीय पर्यटन पूर्वाधार निर्माणमा लगानी गरेको छ। वि.सं. २०८१ र २०८२ को दसैँ मेलाबाट प्राप्त आम्दानीलाई क्लबले पर्यटन विकास तथा सामाजिक काममा परिचालन गरेको हो।

क्लबका सचिव विकास पुनका अनुसार पछिल्लो दुई वर्षमा दोवा क्षेत्रको पर्यटन, भौतिक पूर्वाधार र सामाजिक विकासका लागि कुल २० लाख ७ हजार ७१० खर्च भएको छ। “दोवादेखि धौलागिरि आइसफल जोड्ने पदमार्गको पूर्वाधार निर्माण र प्रवर्द्धनका लागि दुई वर्षमा सबैभन्दा बढी ७ लाख ५८ हजार २५० खर्च गरेका छौँ,” पुनले भने, “क्लबसँग हाल ५ लाख ४९ हजार ९३७ बचत छ।”