खडेरीले रोपाइँ ठप्प, ब्याडमै सुक्न थाल्यो धानको बीउ

असारको दोस्रो सातासम्म पानी नपर्दा लुम्बिनी प्रदेशमा धान रोपाइँ शुरू हुन सकेको छैन। विगतका वर्षहरूमा अहिलेसम्म झण्डै २५ प्रतिशत रोपाइँ भइसक्थ्यो। तर, अहिले पानी नपरेपछि पहाडी जिल्लामा फाटफुटबाहेक तराईमा रोपाइँ हुन नसकेको हो।

गत वर्ष पनि पानी नपरेर राम्रोसँग रोपाइँ गर्न नपाएका किसान यो वर्ष पनि उस्तै संकट सामना गरिरहेका छन्। कृषि विकास निर्देशनालय लुम्बिनी प्रदेशका कृषि प्रसार अधिकृत नविन गैरेले पहाडमा सिँचाइ भएका क्षेत्रमा सामान्यबाहेक लुम्बिनीका तराईका जिल्लामा रोपाइँ हुन नसकेको बताए।