गैंडामाथि अपराध

संरक्षित वन्यजन्तु गैंडाको चोरी तस्करी पछिल्लो समय चुनौतीका रूपमा देखा परेको छ। जसै समयको परिवर्तन भएको छ, तस्कर र सिकारीले पनि नयाँ प्रविधि प्रयोग गर्न थालेका छन्। अपराधमा नयाँ आयामहरू देखा परेका छन्।

३०/४० को दसकमा खाल्डो खनेर त्यसमा गैंडालाई पार्नेहरू अचेल करेन्ट लगाएर मार्न उद्यत हुँदैछन्। कति गैंडा त प्राकृतिक रूपमै परेका पानीका खाल्डामा परेर पनि मर्ने गरेका थिए। तर, सिकारीहरू भने पासो थापीथापी गैंडाको ज्यान लिन्छन् र तिनको खाग तथा हड्डी तस्करी गर्छन्। चितवन राष्ट्रिय निकुञ्जको वार्षिक प्रतिवेदन भन्छ– २०७८/७९ मा निकुञ्ज तथा मध्यवर्ती क्षेत्रमा ३७ वटा गैंडा मरे। ३४ वटाको प्राकृतिक रूपमै मृत्यु भयो भने दुईवटा चोरी सिकारीले मारे। एउटाचाहिँ खाडलमा परी मर्‍यो।