बेलायती प्रधानमन्त्री स्टार्मरको राजीनामापछि नयाँ नेतृत्वको दौड सुरु, यी हुन् दाबेदार

काठमाडौं । बेलायतका प्रधानमन्त्री किएर स्टार्मरले पदबाट राजीनामा दिने सोमबार घोषणा गरेका छन् ।

राजीनामासम्बन्धी सम्बोधनका क्रममा उनले आफ्नो कार्यकालका प्रमुख उपलब्धिको समीक्षा गरे । उनले सन् २०२४ मा लेबर पार्टीलाई सत्तामा फर्काउन सञ्चालन गरिएको चुनावी अभियानको पनि चर्चा गरे ।

करिब दुई वर्षसम्म देशको नेतृत्व गरेपछि पदत्यागको घोषणा गर्दा स्टार्मर भावुक देखिएका थिए । उनको राजीनामासँगै अब लेबर पार्टीभित्र नयाँ नेतृत्व चयनको प्रतिस्पर्धा सुरु भएको छ ।

पार्टीका प्रभावशाली नेताहरू प्रधानमन्त्री पदको दाबेदारका रूपमा अगाडि आएका छन् । वर्तमान गृहमन्त्री शबाना महमुददेखि हालै क्याबिनेटबाट राजीनामा दिएका अल कार्न्ससम्मका नाम नेतृत्वको दौडमा चर्चामा छ ।

स्टार्मरका उत्तराधिकारी बन्न सक्ने प्रमुख दाबेदार–

एन्डी बर्नह्याम

एन्डी बर्नह्याम हालै भएको उपचुनावमा मेकरफिल्डका नवनिर्वाचित सांसद हुन् । बर्नह्यामले सन् २००१ देखि २०१७ सम्म लेह क्षेत्रको सांसदका रूपमा प्रतिनिधित्व गरेका थिए । उनले तत्कालीन प्रधानमन्त्री गोर्डन ब्राउनको सरकारमा वित्त, संस्कृति तथा स्वास्थ्यमन्त्रीजस्ता महत्त्वपूर्ण जिम्मेवारी सम्हालेका थिए ।

सन् २०१७ मा उनी ग्रेटर म्यानचेस्टरका मेयर निर्वाचित भएका । २०२१ र २०२४ मा पुनः भारी मतान्तरका साथ निर्वाचित भए ।

सन् २०२६ जुनमा भएको मेकरफिल्ड उपनिर्वाचनमा विजयी हुँदै उनी संसद्मा फर्किएका हुन् । यही कारण उनले मेयर पदबाट राजीनामा दिएका थिए । हाल उनलाई प्रधानमन्त्री पदको सबैभन्दा बलियो दाबेदार मानिएको छ ।

एञ्जेला रेनर

एञ्जेला रेनर पूर्वउपप्रधान तथा क्याबिनेटमन्त्री हुन् । रेनरले १६ वर्षको उमेरमा विद्यालय छाडेपछि केयर वर्कर र ट्रेड युनियन प्रतिनिधिका रूपमा काम गरेकी थिइन् । उनी सन् २०१५ मा पहिलोपटक सांसद निर्वाचित भएकी थिइन् । २०२० देखि २०२५ सम्म लेबर पार्टीको उपनेता रहिन् ।

सन् २०२४ को निर्वाचनपछि उनी उपप्रधान तथा आवासमन्त्री नियुक्त भएकी थिइन् । तर, निजी सम्पत्ति बिक्रीसँग सम्बन्धित कर विवादका कारण उनले २०२५ मा पद त्याग्नुपरेको थियो । पछि एचएमआरसीले उनलाई कर छलीसम्बन्धी आरोपबाट सफाइ दिएपछि नेतृत्वको प्रतिस्पर्धामा पुनः सक्रिय भएकी छन् ।

शबाना महमुद

शबाना महमुद वर्तमान गृहमन्त्री र पूर्वन्यायसचिव हुन् । अक्सफोर्ड विश्वविद्यालयबाट कानुन अध्ययन गरेकी महमुद पेसाले ब्यारिस्टर हुन् । पाकिस्तानबाट बेलायत बसाइँ सरेका परिवारमा जन्मिएकी महमुद सन् २०१० मा पहिलोपटक सांसद निर्वाचित भएकी थिइन् ।

उनी बेलायतका पहिलो महिला मुस्लिम सांसदमध्ये एक मानिन्छिन् । २०२४ मा न्यायसचिव र लर्ड चान्सलरमा नियुक्त गरिएकी उनी २०२५ को मन्त्रिपरिषद् पुनर्गठनपछि गृहमन्त्री बनेकी थिइन् ।

उनलाई लेबर पार्टीको ‘ब्लु लेबर’ धारसँग निकट मानिन्छ । र, नेतृत्वका निम्ति बलियो विकल्पका रूपमा हेरिएको छ ।

अल कार्न्स

अल कार्न्स पूर्वसैन्य अधिकारी, पूर्वरक्षामन्त्री तथा सांसद हुन् । कार्न्स राजनीतिमा आउनुअघि रोयल मरिनका कर्नल तथा स्पेसल बोट सर्भिसका अधिकारी थिए । उनले अफगानिस्तानमा पाँचपटक सैन्य अभियानको नेतृत्व गरेका थिए । र, ‘मिलिट्री क्रस’ तथा ‘डिस्टिङ्ग्विस्ड सर्भिस अर्डर’जस्ता उच्च सैनिक सम्मान प्राप्त गरेका छन् ।

सन् २०२४ को आमनिर्वाचनमा सांसद बनेपछि उनी स्टार्मर सरकारमा मन्त्री नियुक्त भएका थिए । तर, २०२६ जुन ११ मा सरकारको रक्षा लगानी योजना अपर्याप्त रहेको भन्दै उनले पदबाट राजीनामा दिएका थिए । नेतृत्वको दौडमा उनलाई ‘डार्क हर्स’ अर्थात् अप्रत्याशित रूपमा उदाउन सक्ने बलियो उमेदवारका रूपमा हेरिएको छ ।

वेस स्ट्रिटिङ

वेस स्ट्रिटिङ पूर्वस्वास्थ्यमन्त्री तथा इलफोर्ड नर्थका सांसद हुन् । क्याम्ब्रिज विश्वविद्यालयको विद्यार्थी राजनीतिबाट उदाएका स्ट्रिटिङ नेसनल युनियन अफ स्टुडेन्ट्सका अध्यक्ष समेत रहिसकेका छन् । उनी सन् २०१० मा रेडब्रिज काउन्सिलका पार्षद् बनेका थिए । २०१५ मा पहिलोपटक सांसद निर्वाचित भएका थिए ।

सन् २०२४ मा गठित लेबर सरकारमा उनले स्वास्थ्य तथा सामाजिक हेरचाहमन्त्रीको जिम्मेवारी सम्हालेका थिए । तर, स्टार्मरको नेतृत्वप्रति असन्तुष्टि जनाउँदै उनले २०२६ मे १४ मा पदबाट राजीनामा दिएका थिए । पार्टीभित्र उनी प्रभावशाली वक्ता र कुशल सञ्चारकर्ताका रूपमा परिचित छन् ।

स्टार्मरको बहिर्गमनसँगै लेबर पार्टी नयाँ नेतृत्व चयनको महत्त्वपूर्ण मोडमा पुगेको छ । आउँदो केही साताभित्र हुने नेतृत्व प्रतिस्पर्धाले बेलायतको राजनीतिक दिशालाई समेत प्रभावित गर्ने अपेक्षा गरिएको छ ।

#प्रधानमन्त्री

#राजीनामा

#बेलायत

#किएर स्टार्मर