गौर राइस मिल्सको जग्गामा भूमाफियाको ‘गिद्धे दृष्टि’

रौतहट सदरमुकाम गौरमा रहेको ऐतिहासिक गौर राइस एन्ड फ्लोर मिल्सको जग्गा संरक्षणका लागि नागरिकस्तरबाट खबरदारी अभियान सुरु भएको छ। सार्वजनिक महत्त्व बोकेको उक्त जग्गामाथि पुनः चलखेल र बिक्रीको प्रयास हुन सक्ने आशंका बढेपछि नागरिक अगुवा संरक्षणको पक्षमा संगठित भएका हुन्।

नागरिक समाजको आह्वानमा शनिबार आयोजित सर्वदलीय तथा सर्वपक्षीय छलफलमा गौर राइस मिल्सको जग्गालाई दीर्घकालीन रूपमा संरक्षण गर्दै कानुनी प्रक्रिया पूरा गरी नेपाल सरकारको स्वामित्वमा कायम गराउने विषयलाई प्राथमिकतामा राखिएको थियो। बैठकमा सहभागी अधिकांशले मिल्सको वास्तविक चारकिल्ला यकिन गरी नाप–नक्सा गरेर अतिक्रमित जग्गा फिर्ता ल्याउनुपर्ने धारणा राखेका थिए। जग्गाको स्वामित्व, संरक्षण र सम्भावित बिक्रीसम्बन्धी विषयमा सहभागीबिच समान धारणा बन्न नसक्दा बैठकबाट तत्काल कुनै ठोस निर्णय हुन सकेन।