मुलुक फेरि एकात्मक राज्य प्रणालीमा फर्किने चर्चा छः प्रदीप पौडेल

काठमाडौँ । नेपाली काँग्रेसका महामन्त्री प्रदीप पौडेलले संविधानमार्फत प्राप्त उपलब्धिहरूको रक्षा र संस्थागत विकासका लागि पार्टीलाई थप सुदृढ र संगठित बनाउनुपर्नेमा जोड दिएका छन् ।

मुलुक पुनः एकात्मक राज्य प्रणालीतर्फ फर्कने र संसदीय व्यवस्थालाई कमजोर बनाउने खेल भइरहेको भन्दै उनले संविधानको कार्यान्वयनमा सबैको ऐक्यबद्धता आवश्यक रहेको बताए ।

महामन्त्री पौडेलले वर्तमान संविधानका उपलब्धिहरू समाप्त भएमा मुलुक फेरि पछाडि फर्कने खतरा औँल्याए । विगतमा आफ्नै नेतृत्वले पनि संविधानको मर्म र आशय बमोजिम पूर्ण रूपमा काम गर्न नसकेको स्वीकार गर्दै उनले अहिले भने संविधान नै समाप्त पार्ने गरी गतिविधिहरू भइरहेको दाबी गरे ।

समावेशिता, लोकतन्त्र र सबै समुदायको अस्तित्वलाई स्विकार्ने राजनीतिक शक्तिका रूपमा नेपाली काँग्रेसलाई थप मजबुत बनाउनुपर्ने उनको तर्क छ । काँग्रेसकै नेतृत्वमा संविधान जारी भएको उल्लेख गर्दै उनले लोकतन्त्रलाई बलियो बनाउन र मौलिकताको जगेर्ना गर्न काँग्रेस नै शक्तिशाली हुनुपर्ने बताए ।

उनले भने ‘संविधानमा प्राप्त भएका उपलब्धिहरूलाई संस्थागत गरेर सुरक्षित गरेर जानुपर्ने स्थिति छ । मुलुक फेरि एकात्मक राज्य प्रणालीमा फर्किने गरी चर्चा परिचर्चाहरू भइरहेका छन् । संसदीय व्यवस्थालाई कमजोर बनाउने गरी कामहरू भइरहेका छन् । त्यसैले यही संविधानमा प्राप्त भएका उपलब्धिहरूलाई कार्यान्वयनमा लिएर जाने कुरा आजको दिनमा हामी सबैले मिलेर गर्ने विषय हो भन्ने मलाई लाग्छ । यी उपलब्धिहरू पनि समाप्त भए भने फेरि राज्य एकात्मक प्रणालीतिर फर्कन सक्छ । प्राप्त उपलब्धिहरू सम्पूर्ण रूपमा समाप्त हुन सक्छ । हिजो हामीले नेतृत्व गर्दा हाम्रै नेतृत्वले पनि संविधानको आशय बमोजिम काम गर्न सकेन । आज त संविधानको आशय बमोजिम होइन संविधान नै समाप्त हुने गरी काम भइरहेको छ । त्यसकारण संगठित हुन आवश्यक छ । नेपाली काँग्रेस जसले यो संविधान ल्यायो जसको नेतृत्वमा यो संविधान आयो जसले नेपालमा समावेशिताको कुरालाई सम्पूर्ण रूपमा स्विकार्छ अंगीकार गर्न चाहन्छ कार्यान्वयन गर्न चाहन्छ र नेपालको लोकतन्त्र बलियो बनाउन चाहन्छ त्यो शक्तिलाई मजबुत बनाउन आवश्यक छ । त्यो शक्तिलाई सशक्त बनाउन आवश्यक छ । त्यसका निम्ति लोकतन्त्रभित्र बाँच्न चाहने हो सबै समुदायको अस्तित्व स्वीकार गर्ने सबैको संस्कृति मौलिकता आत्मसात् गर्न सक्ने राजनीतिक शक्ति बलियो हुन आवश्यक छ । त्यो भनेको नेपाली काँग्रेस नै हो। त्यसैले नेपाली काँग्रेसलाई अझ बढी संगठित गर्नका निम्ति सबै समुदायलाई हामीले जोड्न आवश्यक छ ।’

पार्टीलाई अझ बढी संगठित र प्रभावकारी बनाउनका लागि सबै समुदायलाई जोडेर अघि बढ्नुपर्नेमा महामन्त्री पौडेलले जोड दिए ।