सदरमुकाम आउने साँघुरा सडक र अप्ठ्यारा घुम्तीका हराए सडक ऐना

गुल्मी — रेसुंगा नगरपालिका–८ का परमानन्द भण्डारी आफ्नै घरअगाडिको सडक ऐना हराउँदा चिन्तित छन् । घुम्तीजस्तै सडकका कारण दुर्घटना कम गर्न सडक ऐना राखिए पनि अहिले उक्त ऐना नहुँदा दुर्घटनाको जोखिम बढेको उनले बताए । ‘आउजाउ गर्ने गाडीहरू ऐनामा देखिन्थे अनि बिस्तारै आउँथे,’ उनले भने, ‘अहिले ऐना छैन, नजिकै आएर बेस्सरी ब्रेक हान्छन् ।’

स्कुटर चालक रूपा खत्री यो सडकमा आफू धेरै मात्रामा हिँड्ने बताउँदै सडक ऐना फुटेपछि डर लाग्ने अवस्था रहेको गुनासो गर्छिन् । ‘यो बाटोमा राखिएको ऐनाले निकै सहज भएको थियो,’ उनले भनिन्, ‘संरचना बनाउने तर संरक्षण नगर्नु समस्या हो ।’ कसैले संरक्षण गर्न नचाहेको उनको भनाइ छ ।