संसदीय व्यवस्थालाई कमजोर बनाएर एकात्मक प्रणालीमा फर्किने जोखिम बढ्यो : महामन्त्री पौडेल

काठमाडौं । नेपाली कांग्रेसका महामन्त्री प्रदीप पौडेलले मुलुक फेरि एकात्मक राज्य प्रणालीमा फर्किने जोखिम रहेको टिप्पणी गरेका छन् ।

संसदीय व्यवस्थालाई कमजोर बनाउँदै मुलुकलाई एकात्मक राज्य प्रणालीमा फर्काउन जोखिम बढिरहेको उनले बताएका हुन् । शनिबार सानेपामा आयोजित कार्यक्रमलाई सम्बोधन गर्दै उनले संविधान नै समाप्त पार्ने गरी गतिविधि बढिरहेको बताए ।

''यही संविधानमा प्राप्त भएका उपलब्धिहरूलाई कार्यान्वयनमा लिएर जाने कुरा आजको दिनमा हामी सबैले मिलेर गर्ने विषय हो भन्ने मलाई लाग्छ । यी उपलब्धिहरू पनि समाप्त भए भने फेरि राज्य एकात्मक प्रणालीतिर फर्कन सक्छ, उनले भने,''प्राप्त उपलब्धिहरू सम्पूर्ण रूपमा समाप्त हुन सक्छ । हिजो हामीले नेतृत्व गर्दा हाम्रै नेतृत्वले पनि संविधानको आशय बमोजिम काम गर्न सकेन । आज त संविधानको आशय बमोजिम होइन संविधान नै समाप्त हुने गरी काम भइरहेको छ । ''

संविधानमार्फत प्राप्त उपलब्धिहरूको रक्षा र संस्थागत विकासका लागि पार्टीलाई थप सुदृढ र संगठित बनाउनुपर्ने उनले बताए ।

कांग्रेसकै नेतृत्वमा संविधान जारी भएको उल्लेख गर्दै उहाँले लोकतन्त्रलाई बलियो बनाउन र मौलिकताको जगेर्ना गर्न कांग्रेस नै शक्तिशाली हुनुपर्ने उनको भनाइ छ । न्युज एजेन्सी नेपाल ।

#कांग्रेस

#संसदीय व्यवस्था दुर्गन्धित

#एकात्मक व्यवस्था