अभिनेत्री माधुरी दीक्षित पनि भइन् ‘एआई डिपफेक’ को शिकार

मुम्बई । बलिउडकी स्थापित अभिनेत्री माधुरी दीक्षित आर्टिफिसियल इन्टेलिजेन्स (एआई) प्रविधिको गलत प्रयोग अर्थात् ‘डिपफेक’ को शिकार बनेकी छन् । पछिल्लो समय सामाजिक सञ्जालमा माधुरी दीक्षितको भन्दै एउटा भिडियो तीव्र रूपमा भाइरल भइरहेको छ, जसमा उनी एउटा रिभिलिङ कालो रङको पहिरनमा देखिएकी छन् ।

सो भिडियो सार्वजनिक भएपछि कयौँ प्रयोगकर्ताहरूले उनको कपडा र पहिरनलाई लिएर विभिन्न नकारात्मक टिप्पणीहरू गर्न सुरु गरेका थिए । तर, उक्त भिडियो पूर्ण रूपमा नक्कली रहेको तथ्य बाहिर आएको छ । भारतीय पत्रकार जयदीप पाण्डेले सामाजिक सञ्जालमा दाबी गर्दै उक्त भिडियो एआईको सहयोगले तयार पारिएको नक्कली भिडियो भएको स्पष्ट पारेका छन् ।