मोटरसाइकल दुर्घटनामा प्रहरी जवानको मृत्यु

इटहरी- सुनसरीको कोशी गाउँपालिका ८ भाण्टाबारीस्थित पूर्व–पश्चिम राजमार्गमा शुक्रबार राति भएको सवारी दुर्घटनामा एक प्रहरी जवानको मृत्यु भएको छ। मृत्यु हुनेमा जिल्ला उदयपुर त्रियुगा नगरपालिका–२ स्थायी घर भई हाल प्रहरी चौकी कोशी ब्यारेज सुनसरीमा कार्यरत ३२ वर्षीय प्रहरी जवान रन्दिप पौडेल रहेका छन्। उनी कार्यालयको विशेष कामका लागि प्रहरी चौकी कोशी ब्यारेजबाट जिल्ला प्रहरी कार्यालय सुनसरीतर्फ मोटरसाइकलमा जाँदै गर्दा दुर्घटनामा परेका हुन्।

राति करिब १० बजेतिर प्र १–०२–००३ ह १०५२ नम्बरको सिटी सफारी र स ११ प २५०० नम्बरको मोटरसाइकल एकआपसमा ठोक्किँदा पौडेल गम्भीर घाइते भएका थिए। दुर्घटनामा उनको टाउकोमा गम्भीर चोट लागेको थियो।